Nagpaandam ang Mines and Geosciences Bureau (MGB) matapos magsaka sa 9,096 ka barangay sa bug-os nga Pilipinas ang yara sa peligro sang landslide kag pagbaha bangud sa padayon nga pag-ulan halin sa Habagat kag nabilin nga epekto sang bagyong Maymay.
Suno sa MGB, amo ini ang numero sang mga apektado nga barangay sa nagkalain-lain nga rehiyon halin Agosto 8 tubtob 11:
Region 1 (Ilocos Region): 2,933 ka barangay
Region 2 (Cagayan Valley): 47 ka barangay
Region 3 (Central Luzon): 1,997 ka barangay
Calabarzon: 1,806 ka barangay
National Capital Region (NCR): 1,403 ka barangay
Cordillera Administrative Region (CAR): 707 ka barangay
Mimaropa: 113 ka barangay
Ginapahanumdom ang publiko nga gilayon nga magreport sa lokal nga awtoridad kun may makita nga mga senyales sang landslide, mga litik sa dalan, ukon hinali nga pagsaka sang tubig sa mga suba kag sapa.
Ginapanawagan man ang pagsunod sa mga advisories sang lokal nga gobyerno, labi na kun may ipatuman nga preemptive evacuation sa mga mabukid kag manubo nga lugar.
Samtang, suno sa Office of the Civil Defense (OCD), anum na ka tawo ang napatay bangud sa epekto sang Habagat kag sang nagligad nga mga bagyo nga sanday Luis kag Maymay.
