Nagpaguwa sang pagpahanumdom ang Department of Environment and Natural Resources–Mines and Geosciences Bureau (DENR-MGB) sa 6,947 ka barangay sa nagkalain-lain nga bahin sang pungsod nga posible maapektuhan sang landslide bangud sang padayon nga mabaskog nga pag-ulan sini nga semana.
Ang pagpahanumdom nakabase sa pinakabag-o nga 72-hour rainfall forecast sang PAGASA, nga naggamit sang Global Spectral Model (GSM) kag Weather Research and Forecasting (WRF) rainfall threshold.
Suno sa DENR-MGB, ang padayon nga pag-ulan ang bangud sang Bagyong Kiyapo, nga ginapalig-on pa sang Amihan ukon northeast monsoon.
Lakip sa mga rehiyon nga may pinakamadamo nga barangay nga posible maapektuhan amo ang Region 1 nga may 1,142 ka barangay, National Capital Region (NCR) nga may 1,359, Region 7 nga may 861, Region 10 nga may 857, Region 12 nga may 622, Region 2 nga may 579, kag Cordillera Administrative Region (CAR) nga may 524.
Apektado man ang mga barangay sa Regions 4A, 4B, 6, 9, 11, 13, BARMM, kag Negros Island Region (NIR).
Bangud sini, ginhingyo sang DENR-MGB ang mga residente sa mga lugar nga yara sa peligro nga magpabilin nga alerto, magsunod sa mga abiso sang lokal nga panguluhan, kag mag-andam sa posible nga pag-evacuate kon kinahanglan.
Ginpaandam man sang ahensya nga posible pa nga magdugang ang numero sang mga apektado nga barangay samtang nagapadayon ang pag-ulan tuga sang bagyo kag Amihan.
