Nagapanawagan sang gilayon nga tikang ang mga hog raisers sa Tupi, South Cotabato, sa lokal nga panguluhan agud maprotektahan ang lokal nga industriya sang baboy batok sa padayon nga pagpanubo sang presyo sa farmgate.
Sa interview sang Bombo Radyo Koronadal ginpahayag ni Amy Jean Jugador, lider sang Polomolok Hog Raisers, nga kinahanglan nga magpatuman man sang executive order ang Banwa sang Tupi kag iban pa nga mga banwa pareho sang Surallah, Banga kag General Santos City nga magapatuman sang minimum farmgate price para sa buhi nga baboy.
Dugang ni Jugador nga nagalab-ot sa P15,000 ang gasto sa pagpadako sang isa ka baboy tubtob 120 kilos, apang ginabaligya lamang ini sa P11,000 tubtob P12,000. Nagakahulugan ini sang posible nga kapin P3,000 nga kalugian sa kada baboy.
Nagpaandam man siya nga indi lamang hog raisers ang maapektuhan sang krisis kundi pati ang trucking kag hauling services, feeds manufacturers, mga mangunguma sang mais, suppliers kag meat vendors.
Suno sa iya, may mga hog raisers na nga nag-untat sa pagpamuhi bangud indi na makasarang sa pagbakal sang feeds kag nagadamo ang ila mga utang. Ginkwestyon man ni Jugador ang posible nga benepisyo sang 60-day pork import ban, bangud may yara pa sang imported pork supply nga mahimo mag-abot sa 110 ka adlaw.
Bangud sini, ginapanawagan niya ang mga lokal nga opisyal nga magpatuman sang nagakaigo nga mga tikang agud mabalanse ang supply, demand kag presyo sang baboy kag malikawan ang dugang nga pagsira sang mga lokal nga hog farms.













