Ginlaragway sang residente sang Purok Magsaysay, Barangay Rotonda, Koronadal City ang iya pagkadiskubre sa patay nga lawas sang isa ka lapsag nga bitbit sang ido pakadto sa ila compound.
Sa interview sang Bombo Radyo Koronadal, ginpahayag ni Fely Baldevieso nga una niya nga nakita ang ido nga may ginakagat nga butang.
Sang iya ini gin-usisa, didto niya nahibaluan nga isa gali ini ka patay nga lapsag.
Suno kay Baldevieso, gilayon nila nga ginkumpirma sang iya bana ang ila nakita kag nagtawag sa mga opisyal sang barangay agud ireport ang insidente.
Ginpahayag man niya nga wala sila sang may nakita nga nagdala sang lapsag sa ila compound ukon sa ila purok, apang may mga babayi nga nagadala sa sentro sang barangay.
Dugang pa ni Baldevieso, wala pa sa kahimtangan sang pagkadunot ang lapsag sang una niya ini nga nakita, apang nag-umpisa na ini nga ma-agnas bangud sa posible nga pagkabilin sa idalom sang init sang adlaw kag hangin.
Bangud sini, nagapanawagan siya sa mga ginikanan nga indi pagpabay-an ang ila mga lapsag kag masiguro nga mahatagan ini sang nagakaigo nga pagdumala kag lubong.
Sa karon, ginturn-over na sa kapulisan ang patay nga lapsag kag nahibaluan nga ginlubong na ini sa Brgy. San Jose.













