Ginpresentar sang defense team si Department of Trade and Industry (DTI) Undersecretary Ceferino Rodolfo bilang testigo sa ika-45 nga adlaw sang impeachment trial ni Vice President Sara Duterte, Biyernes, Nobyembre 20, agud magpaathag parte sa rehistro kag mga insentibo nga nabaton sang isa ka kompanya nga may kaangtanan sa mga alegasyon sa impeachment complaint.
Sa pagpaathag ni defense lawyer Atty. Justin Nicol Gular sa offer of testimony, si Rodolfo amo ang nagpagwa sang Certificate of Registration para sa Cale88 Foods Corporation bilang export enterprise sa idalom sang Board of Investments (BOI).
Nagatutok ang kompanya sa paghimo kag pag-export sang banana chips kag kwalipikado sa nagkalain-lain nga insentibo sang gobyerno, lakip ang Income Tax Holiday, Special Corporate Income Tax, duty exemption kag VAT exemption ukon zero-rating.
Suno sa depensa, importante ang testimonya ni Rodolfo agud maathag ang proseso sang pagparehistro sang kompanya kag ang mga benepisyo nga mahimo sini mabaton halin sa gobyerno.
Kabahin man sang iya testimonya ang pag-identify sang mga dokumento nga may kaangtanan sa Cale88 Foods Corporation kag sa mga transaksyon nga ginatalakay sa impeachment proceedings.
Ginalauman sang depensa nga paagi sa iya testimonya, mapakita nga wala sang kamatuoran ang mga alegasyon sa idalom sang Article II sang impeachment complaint, lakip ang mga isyu nga ginabase sa forensic report nga ginpreparar ni prosecution expert Atty. Alexander B. Cabrera.













