Ginkwestyon ni House Prosecution Adviser Robert Ace Barbers ang mga detalye sang ginapahayag pagpangayo sang bulig halin sa isa sa duha ka anay household staff members ni Vice President Sara Duterte, nga nagapahayag nga ginapahog ang ila kabuhi.
Suno kay Barbers, dapat klaruhon kon paano naka-text message ang ginaalegar biktima kon indi kuno sila hilway nga maghulag-hulag.
Bangud sini, ginpanindugan sini nga dapat anay i-verify kag usisaon sang Philippine National Police (PNP) ukon sang National Bureau of Investigation (NBI) ang impormasyon agud mahibaluan kon bala ang duha ka anay staff members ang gina-hold batok sa ila kabubut-on, kag agud matumod kon sin-o ang posible nga nadalahig.
Ginhatagan man pagtamod ni Barbers nga ang butang indi dapat magpabilin nga isa lamang ka koleksyon sang mga alegasyon. Ginpahayag sini nga dapat manabat ang sin-o man nga mapamatud-an nga may kahilabtanan sa insidente.
Madumduman nga ginpahayag ni Atty. Paolo Panelo, tagpamaba ni VP Duterte nga nagpangayo sang bulig ang isa sa mga anay staff members. Suno sa report, ginpahayag nila nga ginapahog ang ila kabuhi kag ginapilit sila nga magpirma sa isa ka dokumento.
Padayon nga nagakinahanglan sang pag-usisa ang mga alegasyon agud mapamatud-an kon ano gid ang matuod-tuod nga natabo.













