Nagpahayag ang Department of Energy nga nagkasugtanay ang Japan kag Philippines nga palig-unon ang ila kooperasyon sa energy security, lakip ang bulig sang Japan sa pagtukod sang una nga strategic petroleum reserve system sang Pilipinas.
Ang kasugtanan ginpabutyag matapos ang miting sa Tokyo nila Japan Prime Minister Sanae Takaichi kag President Ferdinand Marcos Jr., kun sa diin ginpat-od nila ang pagpalig-on sang supply chain resilience sa tunga sang nagabag-o nga geopolitical situation sa kalibutan.
Sa idalom sang POWERR Asia framework, magahatag ang Japan sang technical kag financial assistance pinaagi sa mga ahensya kasubong sang Japan Organization for Metals and Energy Security kag Japan Bank for International Cooperation para sa stockpiling facilities kag iban pa nga proyekto.
Nagkasugtanay man ang duha ka pungsod nga mangin panguna sa paghimo sang ASEAN-wide joint oil stockpiling roadmap agud mapalig-on ang energy security sa rehiyon.
