Ginapatihan nga 5 ka mga indibidwal ukon grupo ang mga suspek sa pagpang-ambush sa katapo sang 2nd Police Mobile Force Company (PMFC), Maguindanao Police Provincial Office (MDSPPO) sa Maguindanao Street, Brgy. Mother Poblacion, Shariff Aguak, Maguindanao del Sur.
Sa interview sang Bombo Radyo Koronadal kay Lt.Col Ronald Suscano, Spokesperson – 6th Infantry Division, Philippine Army, iya ginpahayag nga apisar indi pa mahatag ang eksakto nga detalye may kaangtanan sa numero sang mga suspek, apang ginbalubanta nga isa ini ka grupo.
Ginpahayag man ni Suscano nga gina-imbestigaran naman sang Maguindanao Police Provincial Office ang posibilidad sang testigo ukon CCCTV footage sa lugar agud makabulig sa pagtumod sa mga suspek.
Gindugang pa niya nga kasamtangan nga naka-red alert status man ang lugar sang insidente agud masiguro ang seguridad sang publiko.
Madumduman nga ginbawian sang kabuhi ang lima (5) ka mga pulis kag pilason pa ang tatlo (3) matapos ang pag-ambush sa ila ginasakyan nga patrol car nga pabalik na kuntani sa Camp Datu Akilan matapos sila magpatrolya, alas 9:10 sang gab-I, Marso 28, 2026.
Sa karon, nagapadayon ang hot pursuit operation sang mga otoridad agud maarestar ang mga suspek nga responsable sa pagpang-ambush sa mga biktima.
