Luwas nga narescue ang driver kag anum ka pasahero sang Toyota Innova matapos mahulog ang ila ginasakyan sa nabaw nga pil-as sa Prk. Kauswagan, Barangay Saravia, syudad sang Koronadal, subong nga adlaw sang Sabado, Oktubre 10.
Base sa inisyal nga impormasyon nga nakuha sang kapulisan, ginatan-aw nga posible nga ang kakapoy sang driver amo ang nangin rason sang aksidente.
Sa interview sang Bombo Radyo Koronadal kay Police Master Sergeant Fely Bascon, traffic investigator, ginpahayag sini nga posible nga nakapiyong sing makadali ang driver samtang nagamaneho, rason nga nadulaan ini sang kontrol sa salakyan kag nahulog sa pil-as.
Nahalin ang nasambit nga Toyota Innova sa General Santos City kag nagapadulong kuntani sa banwa sang Surallah, South Cotabato. Ang driver kag tanan nga pasahero residente sang amo nga banwa kag miyembro sang isa ka pamilya.
Ginkumpirmar man ni Bascon nga may mga kabataan nga sakay sa salakyan, lakip ang pinakamanghod nga anum ka tuig ang edad.
Samtang, wala sang tuman nga pilas ang naangkon sang driver kag sang anum ka pasahero. Ang tanan yara na sa maayo nga kondisyon kag ginahatagan sang nagakaigo nga pag-atipan sa balay-bulolngan.
Ginklaro man sang traffic investigator nga wala sang iban nga salakyan nga nadalahig sa insidente, bangud ang Toyota Innova lamang ang nahulog sa mabaw nga pil-as.
Padayon pa ang imbestigasyon sang kapulisan agud mahibaluan ang bug-os nga mga sirkumstansya sa likod sang aksidente.
