Nangin malinong ang una nga adlaw sang season of Lent sa bahin sang syudad sang Koronadal, kag nangin madinalag-on man ang Ash Wednesday ukon Miyerkules De Badlis nga amo ang opisyal nga pagsugod sang Lenten Season sang mga Romano Katoliko.
Nag-umpisa ang misa sa Christ the King Cathedral sa Koronadal alas-5:30 sang aga, ginsundan sang misa sa 8:00am, 12:00pm, kag ang ulihi nga misa ginpatigayon alas-5:15 sang hapon.
Madumduman nga ginhingyo sang Catholic Bishops’ Conference of the Philippines (CBCP) ang mga Katoliko nga magpuasa indi lang sa pagkaon kundi pati man sa paggamit sang digital media.
Suno sa sulat ni CBCP President, Lipa Archbishop Gilbert Garcera, ang pagpuasa indi lang pagpakita sang pagkatawo kundi isa ka sinsero nga paghalad sa Diyos.
Dugang pa sang CBCP, ang digital media may dakû nga impluwensya sa adlaw-adlaw nga kabuhi sang mga tawo, ilabi na sa sini nga tion.
Ang digital fasting, suno sa CBCP, nagatuyo sa pagpanumbalik sang balanse nga lifestyle, may mas madalum nga pagtuo, kag mas makahulugan nga relasyon sa pamilya kag iban pa.
