Ginpabutyag sang Registered Social Worker nga si John Ryan Huqueriza nga dapat ibase sa aktuwal nga panginahanglan sang komunidad kag kadamuon sang estudyante ang pag-deploy sang social workers sa mga buluthuan.
Sa interview sang Bombo Radyo Koronadal ginpahayag ni Huqueriza, kinahanglan may husto nga ratio sa tunga sang social workers kag populasyon agud malikawan ang sobra nga workload kag professional burnout.
Dugang ni Huqueriza, nga ang “need assessment” agud malantaw kon pila ka social workers ang kinahanglan sang isa ka buluthuan ukon komunidad.
Indi suno sa iya igo nga magpatuman sang patakaran nga isa ka social worker para sa kada buluthuan, bangud nagalain-lain ang kadamuon sang estudyante kag mga concern sa tagsa ka lugar.
Paathag niya, kon sobra ang workload sang social worker, mahimo maapektuhan ang kalidad sang serbisyo kag ang tion nga mahatag sa tagsa ka estudyante nga nagakinahanglan sang intervention.
Apang ginpabutyag man ni Huqueriza nga indi lamang social workers ang responsable sa pagsabat sa mga problema sang kabataan. Kinahanglan ang kooperasyon sang pamilya, institusyon, gobyerno kag komunidad agud mas epektibo nga mahatagan sang guidance, serbisyo kag proteksyon ang mga estudyante.
