Ginpalig-on sang Department of Social Welfare and Development (DSWD) ang psychological kag psychosocial interventions para sa mga estudyante kag ginikanan nga naapektuhan sang insidente sa Banga National High School.
Suno kay DSWD Secretary Rex Gatchalian, indi kinahanglan nga personal nga magkadto ang mga apektado sa social workers para lamang magpa-assess. Mahimo sila makapangayo sang bulig kon may nabatyagan nga epekto sa ila mental, emotional kag psychosocial well-being.
Kabahin sa frontline response ang Department of Education (DepEd), nga nagahatag sang intervention sa buluthuan, samtang nagabulig ang DSWD sa dugang nga suporta kag serbisyo.
Apang indi lamang ang mga direkta nga nakasaksi ukon yara malapit sa insidente ang mahimo makapangayo sang bulig. Suno kay Gatchalian, mahimo man magpalapit sa DSWD ukon iban nga ahensya ang bisan sin-o nga nakabatyag sang psychological o emotional distress bangod sa natabo.
Kabahin sa intervention ang Trauma-Informed Care, nga nagabulig sa pagkilala sang mga estudyante kag ginikanan nga nagapakita sang red flags kag posible nga nagakinahanglan sang mas intensive nga intervention.
Ginpabaskog man ni Gatchalian nga may yara na sang mga programa ang DSWD antes pa ang insidente, lakip ang Family Development Sessions, nga nagatutok sa pagpalig-on sang pamilya bilang importante nga unang support system sang kabataan.
