KORONADAL CITY – Nagapadayon ang imbestigasyon sang mga otoridad angot sa nasapwan nga bangkay sang isa ka lalaki sa kanal sa Purok Tagumpay, Barangay Poblacion, Tantangan, South Cotabato, pasado alas-5:40 sang aga, Lunes nga adlaw, Disyembre 1.
Ginkilala sang pamilya ang biktima nga si Juan Ogena Roxas Jr., wala trabaho, kag residente sang Purok Lower Maligaya sa nasambit nga banwa.
Suno kay Police Major Romeo Albano, nadiskubrihan sang mag-asawa nga sanday alyas Octavio kag Olivia ang biktima samtang nagalakat sila sa lugar.
Nakit-an sang mga ini nga nagahigda sa semento ang lalaki, rason nga gilayon nila ini nga ginreport sa Tantangan Police Station.
Sa inisyal nga imbestigasyon, ulihi nga nakit-an si Roxas sang hapon sang Nobyembre 30 samtang nagainom upod sa iya mga paryente.
Ginpahayaga nga nagpauli pasado alas-8 sang gab-i ang biktima matapos makainom sang makahulubog nga ilimnon.
Sa karon, hindi pat-od kun may foul play sa kamatayon sini.
Gindala na ang bangkay sa isa ka funeral parlor sa Tantangan para sa post-mortem examination agud mahibaluan ang gintunaan sang iya kamatayon.
