“Indi pwede nga ipabatyag ta sa ila nga kita nahadalok sa ila, dapat sila ang mahadlok sa aton.”
Ini ang pahayag ni Koronadal City Mayor Erlinda Araquil sa interview sang Bombo Radyo Koronadal, may kaangtanan sa mga pamahog nga ginapalapta sa social media.
Suno kay Mayor Araquil, kinahanglan nga matukiban ang lokasyon sang mga persona nga nagapalapta sang pamahog online kag mapasakaan sang nagakaangay nga kaso.
Gilayon man nga nag-inspeksyon ang alkalde sa nagkalain-lain nga buluthuan sa syudad agud makig-istorya sa mga principal kag kamustahon ang kahimtangan sang mga estudyante matapos ang insidente sa Banga National High School.
Ginpahayag ni Araquil nga nakabakal na ang city government sang 15 ka metal detectors nga ginpanagtag sa nagkalain-lain nga eskwelahan, ilabi na sa mga buluthuan nga nakabaton sang pamahog sa social media.
Padayon man ang koordinasyon sang Koronadal LGU sa City Disaster Risk Reduction and Management Office kag kapulisan para sa mas madasig nga pag-monitor kag pagpatuman sang security measures sa mga eskwelahan.
Samtang, ginatan-aw man sang city government ang posibilidad nga ipatuman ang modular learning sa pila ka buluthuan bilang kabahin sang mga safety measures.
Ginpanawagan naman ni Mayor Araquil ang mga ginikanan nga bantayan, giyahan kag disiplinahon ang ila mga kabataan, ilabi na sa paggamit sang social media. Gin-agda man niya ang mga ginikanan nga tudluan ang ila mga kabataan nga likawan ang mga aktibidad kag online groups nga mahimo magdul-ong sa malain nga pamatasan ukon insidente.
