Yara sa dalom sang hurisdiksyon sang korte ang desisyon kon makaboto ang mga legally detained o nakakulong nga mag senador sa nagapadayon nga impeachment trial batok kay Vice President Sara Duterte.
Ini ang nangin pahayag sang isa ka private nga abogado nga si Atty. Jasper Kent Perez sa isa ka interview sa Bombo Radyo Koronadal, kasunod sang diskusyon konpwede bala makaupod sa voting threshold sanday Senator Jinggoy Estrada kag Senator Rodante Marcoleta.
Suno kay Atty. Perez, bisan pa may handom ukon tuyo ang mga senador nga magboto sa mga hagna ukon desisyon sang pagtilaw, ang ila kahilwayan ukon personal nga hulag nakasalalay sa pahanugot sang Sandiganbayan. Gin-athag niya nga kon magpamatbat ang korte nga magpabilin ang mga ini sa karsel ukon indi magtugot sa ila paggua, wala sang mahimo ang mga mambabatas kundi tumanon ini bangud wala sila sang gahum nga piliton ang korte.
Ginkabig man sang abogado nga “fair” ukon husto lang ang amo nga sitwasyon, kag gin-anggid ini sa kahimtangan sang isa ka ordinaryo nga pumuluyo ukon preso limitahan ang liberty ukon kahilwayan ginabawalan man ukon ginapunggan sang layi.
Ginpabutyag man ni Atty. Perez ang iya pahayag sa pagpahinumdom sa publiko nga ang pag-angkon sang katarungan wala nagadepende sa posisyon sa kabuhi sang isa ka tawo. Suno sa iya, sa atubangan sang batas, wala sang manggaranon ukon pobre—tanan may yara sang patas nga kinamatarong nga dapat respetuhon.
