Arestado ang isa ka suspetsado sa pag dala sang ilegal nga armas sa banwa sang T’boli, South Cotabato kahapon nga adlaw sang Miyerkules, Nobyembre 12, 2025.
Ginkilala ang suspetsado sa kay alyas “Angelito,” 54 anyos, may asawa, isa ka Security Guard, kag residente sang Darimco Street, Silway, Dadiangas West, General Santos City. Antes pa siya maaresto, ginpamangkot siya sang mga nagresponde nga pulis parte sa mga dokumento kag otoridad niya sa pagpanag-iyahan sang amo nga pusil, apang wala siya makapakita sang ano man nga papeles.
Base sa Tboli Municipal Police Sub-Station nga nahamtang sa Barangay Aflek, Tboli, South Cotabato nakabaton sila sang report halin sa isa ka concerned citizen nga may isa ka indibidwal nga nagadala sang pusil sa Sitio Datal Bila, Barangay Malugong, Tboli, South Cotabato.
Gilayon nga nagresponde ang team sang nasambit nga estasyon agud mapamatud-an ang nasambit nga report, kag resulta sini amo ang pag-aresto sang suspetsado kag pagkumpiska sang isa (1) ka unit nga twelve-gauge shotgun nga may chamber kag may tatlo (3) ka bala nga nakasalud.
Samtang, ang nakumpiskar nga pusil kag mga bala para sa angay nga disposisyon.
Sa subong, ginapreparar na ang reklamo para sa paglapas sa Republic Act No. 10591 nga ipasaka paagi sa inquest proceeding batok sa suspetsado sa Office of the Provincial Prosecutor, Koronadal City.
