Nagpaandam si PLt. Harold Cornel, Chief of Police sang Koronadal City Police Station, sa peligro sang Nihilistic Extremist Violence kag sa posible sini nga epekto sa panghunahuna kag pamatasan sang mga kabataan.
Suno kay Cornel, posible nga target sang mga extremist group ukon organisasyon ang mga kabataan kag menor de edad bangud mas madali sila maimpluwensyahan paagi sa online platforms kag social media.
Paagi sa ginatawag nga grooming, mahimo nga impluwensyahan ang mga kabataan nga magbatyag sang pagdumot ukon pag-hate sa sosyudad kag sa mga nagapadayon nga sistema kag pamatasan.
Sa ulihi, mahimo ini magdul-ong sa pagbaton sang mga ideya ukon pamatasan nga mahimo magresulta sa kriminal nga mga aksyon.
Bangud sini, ginapanawagan ni Cornel ang mga ginikanan nga mas tutukan ang online activities sang ila mga kabataan kag hibaluon kon sin-o ang ila mga ginaistorya ukon gina-updan sa social media.
Ginpabaskog man niya nga kinahanglan ang padayon nga paggiya kag bukas nga komunikasyon sa sulod sang pamilya agud mas mapaathag sa mga kabataan ang peligro sang mga makahalalit nga online content kag impluwensya.
Dugang pa ni Cornel, importante ang kooperasyon sang pamilya, buluthuan kag komunidad sa pagpanalipod sa mga kabataan batok sa mga extremist influence kag iban pa nga peligro nga mahimo nila maatubang sa social media.
