Ginpunto sang pila ka mga Senador nga mahimo gihapon nga magpadayon ang impeachment trial batok kay Vice President Sara Duterte sa pihak sang desisyon sang Supreme Court (SC) nga nagadeklarar sa ikaapat nga impeachment complaint nga “unconstitutional” ukon paglapas sa konstitusyon.
Ginpahayag ni Sen. Joel Villanueva nga ini bangud nga ang impeachment court isa ka “sui generis,” ukon legal nga termino nga nagakahulugan nga pinasahi kag separado nga naga-operate sa mga proseso nga ginapatuman sa regular nga mga korte.
Gin-angot niya ini sa natabo sa tunga sang impeachment proceedings batok kay former Chief Justice Renato Corona sa diin nagpagwa ang Korte Suprema sang temporary restraining order apang ginbalewala ini sang Senate impeachment court matapos ini nga ginbotohan sang mga myembro sini.
Ini man ang paglantaw ni Sen. Vicente Sotto III sa diin iya ginpahayag nga ginhambalan sia sang isa ka “legal luminary” nga mahimo nga balewalaon sang Senate impeachment court ang SC decision.
Apang gin-athag man ni Sotto nga pagatun-an pa niya ini.
Sang ulihi, nagpadala si Sotto sang mensahe sa mga reporters nga apisar nga “unexpected” ang amo nga desisyon, nagasunod sia sa kaalam sang SC sa hustisya.
Ginpahayag man sang Senador nga may yara sang “climate change,” bangud kinaandan nga wala nagapanghilabot ang mataas nga korte sa politikal nga mga isyu.
Sa bahin naman ni Sen. Bam Aquino, ginpabutyag niya ang iya sentimento nga dapat magpadayon ang impeachment trial kag nanawagan sang caucus nga magatalakay sa desisyon sang SC kag sang papel sang Senado sa konstitusyon.//Ginkatingala naman ni Sen. Risa Hontiveros, ang desisyon sang SC nga nagatumod sang paglapas sa “one-year bar rule” sa impeachment complaints bisan nga isa man lang ka kaso ang na-file sa Senado.
