KORONADAL CITY – Ginkumpirmar sang Police Regional Office 12 o PRO-SOCCSKSARGEN Region nga ginrelieve sa posisyon ang isa ka police colonel nga ginreklamo sang sexual abuse sang isa ka babaye nga pulis.
Ini ang ginpahayag ni Police Major Rissa Hernaez, spokesperson sang PNP Region 12 sa interview sang Bombo Radyo Koronadal.
Apang, suno kay Hernaez, ang PNP national headquarters sa Camp Crame ang nagpaguwa sang impormasyon angot sa police official nga wala na sini ginhingadlan pa.
Gin-athag man ni Hernaez nga sila mismo sa Police Regional Office 12 sa General Santos City ang wala makabaton sang reklamo halin sa isa suno pa ka pulis man nga ginaaligar nangin biktima sang nasambit nga opisyal.
Kaangot sini, matapos nga gin-anunsyar ni PNP spokesperson Brig. Gen. Jean Fajardo ang angot sa police colonel, gilayon ini nga ginpaidalom sa Personnel Holding and Accounting Unit.
Nagpatigayon man sang inquiry ang PNP 12 matapos sini kag ginasalig na sa Regional Internal Affairs Service 12 ang madalom nga imbetigasyon sa kaso agud nga indi maduha-duhaan nga may magluntad nga irregularidad sa natabo.
Natalana naman nga magpadulong sa General Santos City ang mga imbestigador gikan sa Camp Crame agud nga isytoryahon ang biktima angot naman sa ginapatigayon nga parallel investigation sa kaso.
Madumduman nga ginbuyagyag man ni Fajardo nga ang police colonel nga ini ang ginreklamo man anay sang sexual harassment sang iya mga tinawo nga babaye sang ini ang na-assign pa sa Region 11 sa Davao City.
Sa karon, wala pa tigayon nga makakas ang opisyal bilang katapu sang PNP bangud wala pa nakapaguwa sang rekomendasyon ang mga nagaimbestigar sa reklamo batuk sa iya.
