Napatay ang tatlo samtang 36 ang napilasan matapos atakehon ang duha ka airport sa Saudi Arabia, kasunod sang nagalala nga pag-inaway sa Yemen.
Suno sa Saudi civil aviation authorities, napatay ang isa kag napilasan ang walo sa pag-atake sa King Khalid International Airport sa Riyadh. Samtang, napatay ang duha kag nasamaran ang 28 sa mga pasilidad sang Abha Airport.
Gin-angkon sang grupong Houthi ang responsibilidad sa pila ka pag-atake, lakip ang paggamit sang mga drone batok sa airport sa Riyadh.
Nagpalunsar naman sang pag-atake ang Saudi-led coalition bilang sabat batok sa mga target sang Houthis sa Yemen. Suno sa coalition, kapin 80 ka Houthi military sites ang gintarget nila sa mga probinsya sang Saada, Hodeidah, Jawf kag Marib.
Gin-atake man sang Houthis ang Aden International Airport sa Yemen gamit ang mga missile kag drone. Suno sa Yemeni Transport Ministry, nagtupa ang isa ka missile malapit sa runway pila ka minutos antes ang nakatakda nga paglapag sang isa ka flight halin Cairo.
Bangod sini, wala nakapadayon sa paglapag ang eroplano kag ginbalhin ang flight sini sa Jeddah, Saudi Arabia.
Nagapadayon ang paglala sang inaway sa Yemen, nga nagresulta man sa paglikas sang kapin 200,000 ka tawo, suno sa International Organization for Migration.
