Gindumdum sang anay Vice Governor sang South Cotabato ang kahimtangan sang Koronadal antes pa ini nangin syudad.
Sa interview sang Bombo Radyo Koronadal kay Koronadal City Administrator Vicente De Jesus, ginpahayag niya nga nalabawan pa sang kasamtangan nga pag-uswag sang syudad ang vision nga ila ginhandum anay ni anay Governor Daisy Avance-Fuentes.
Masinadyahon man nga ginbalikan ni De Jesus ang pag-uswag sang Koronadal, halin sa tion nga kulang pa ini sa mga imprastruktura tubtob sa pagkab-ot sang pag-uswag indi lamang sa ekonomiya kundi pati sa mga programa kag serbisyo.
Ginpahayag man niya nga indi lamang sa mga imprastruktura makita ang pag-uswag sang syudad, kundi pati sa paghiliusa kag aktibo nga pagpartisipar sang mga Koronadaleños sa nagkalain-lain nga aktibidad.
Gani, liwat nga gin-agda ni De Jesus ang publiko nga magpartisipar kag mag-upod sa mga inisyatibo para sa padayon nga pag-uswag sang syudad.
