Nag-file sang ‘not guilty’ plea ang kampo ni anay Bamban, Tarlac Mayor Alice Guo ukon ang Chinese national nga si Guo Hua Ping sa kaso nga qualified human trafficking sa Pasig Regional Trial Court Branch 167.
Suno sa isa sa mga abogado ni Guo nga si Atty. Nicole Jamilla, nag-plea nga not guilty ang anay alkalde paagi sa videoconference.
Ginpahayag ni Jamila nga hugot nga ginapanginwala ni Guo ang mga alegasyon batuk sa iya.
Konektado ang ini nga kaso sa gin-raid nga Philippine Offshore Gaming Operator (POGO) hub sa Bamban, Tarlac sa diin 800 ka mga Pinoy kag mga foreigners ang na-rescue.
Una na nga ginmandu sang Pasig RTC ang pagsaylo kay Guo halin sa Philippine National Police (PNP) Custodial Center pakadto sa Pasig City Jail Female Dormitory.
Magluwas sa iya nga human trafficking case, nagapangatubang man si Guo sang graft case sa Valenzuela court.
Gin-file man ang quo warranto petition batuk kay Guo sa Manila court, kag ang petition nga i-cancel ang iya nga birth certificate sa Tarlac court.
Nagapangatubang man si Guo sang tax evasion complaint kag 87 counts sang money laundering sa Justice Department.
