Nagapadayoon ang imbestigasyon sang mga otoridad sa nagluntad nga pagpangluthang-patay sa isa ka Indigenous Peoples Leader sa Barangay Bongo, South Upi Maguindanao Del Sur.
Ginkilala ni Maguindanao del Sur PNP Provincial Director PCol. Roel Sermese ang biktima nga si Elvin Moires, isa ka Brgy. Kagawad sang Barangay Bongo, South Upi Maguindanao Del Sur.
Naguwa sa imbestigasyon nga papuli na kuntani ang biktima halin sa isa ka tribal wedding sang ginluthang ini sang wala pa matumod nga mga suspek.
Naka-angkon sang malala nga igo sa nagkalain-lain nga bahin sang iya nga lawas ang biktima, gindangat naman ini sa pinakamalapit nga balay-bulungan apang gindeklarar ini sang dead on arrival sang attending physician.
Ginpahayag pa sang PNP nga biktima man ang nasambit nga tribal leader sang harrasment sang tuig 2018 sa diin ginluthang sang mga armado nga mga suspek ang puluy-an sini.
Padayon naman ang imbestigasyon sang mga kapulisan sa nasambit nga krimen nga nagluntad sa nasambit nga lugar.
Hustisya naman sa subong ang panawagan sang pamilya kag mga himata sang napatay nga biktima.
