KORONADAL CITY – May ginatumod na nga persons of interests ang kapulisan sa pagpangluthang-patay sa Barangay Kapitan sang Brgy.Laguilayan sa banwa sang Isulan,Sultan Kudarat.
Ini ang ginpahayag ni PLt. Col. Julius Malcontento, hepe sang Isulan PNP sa interview sang Bombo Radyo Koronadal.
Ginkilala ang napatay nga biktima nga si Punong Barangay Amado Avilles Serra Jr, 64 anyos kasado kag residente sang Purok 5, Brgy.Laguilayan sang amo nga banwa.
Sa imbestigasyon sang Isulan PNP,nahibaluan nga magabakal kun tani si Kapitan Amado halin sa Barangay Hall sang nag-overtake ang 2 ka wala pa makilal-an nga mga suspek kag gin palukpan sang makapila ka beses ang hinambitan nga barangay kapitan.
Nag-agom sang igo sang bala ang biktima sa iya ulo kag iban pa nga parte sang iya kalawasan nga nangin tunaan sang iya nga kamatayon.
Gilayon naman nga gindangat ang biktima sa balay bulolngan apang gindeklara nga dead on arrival sang iya mga doktor.
Samtang nagapadayon sa gihapon ang hot pursuit operation ang mga katapo sang Sultan Kudarat Police Provincial Office kag Isulan PNP para sa mas madasig nga pagkilala kag pagdakop sa 2 ka mga suspetsado.
