KORONADAL CITY – Arestado ang isa ka delivery rider nga ginakabig Street Level Individual matapos mabaklan sang nagpakuno-kuno nga poseur buyer sa Purok 10, Brgy. Dansuli, Isulan, Sultan Kudarat.
Ginkilala ni Police Lieutenant Colonel Julius Malcontento, hepe sang Isulan Municipal Police Station, ang suspek nga si alyas “Ali”, 20-anyos, soltero kag residente sang Purok Mamantal, Barangay Kalawag 3, Isulan, Sultan Kudarat.
Suno kay PLtCol Malcontento, alas-9:10 sang aga sang maaresto ang suspek sng mga tinawo sang Isulan MPS Intel Operatives/MDEU kag 1st SKPMFC, matapos makabakal sang ginapatihan nga ang isa ka poseur buyer nga katapu sang otoridad.
Nakumpiska sa suspek ang 3 ka plastic sachet sang ginapatihan nga shabu nga may kabug-aton nga 1.1 gramo nga nagakantidad sang Php7,480 kag Php500 bill nga buy-bust money.
Sa subong, ginapreparar na ang kaso nga paglapas sa seksyon 5 kag 11 sang Article II RA 9165 ukon “Comprehensive Dangerous Drugs Act of 2002”.
