KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang-patay sa isa ka 20-anyos nga soltero sa bahin sang Polon Store, Purok Maawain, Brgy San Jose, Koronadal City.
Ginkilala ang biktima nga si John Mark CadungogLawac, 20 anyos, soltero, construction worker, kag residente sang Purok Centro, Brgy San Jose, Koronadal City.
Suno kay Barangay Kapitan Danilo Simtim sang Barangay San Jose, antes pa man ang insidente, nag-inom sang makahulubog nga ilimnon ang biktima kag nagpadulong sa tindahan agud magtambay.
Apang, hinali na lamang nga may duha ka mga kalalakihan nga nag-abot sakay sang motorsiklo kag gintiro ang biktima sang makapila ka beses.
Nakaangkon sang igo sa ulo kag iban pa nga bahin sang iya lawas ang biktima nga nangin tunaan sang kamatayon sini.
Nakuha sa crime scene ang duha ka mga basiyo sang calibre 45 nga armas luthang.
Indi pa man matumod ang motibo sang krimen.
Kaangot sini, nagpanawagan naman si Simtim sa sin-o man nga may ihibalo sa krimen nga magbulig sa mga kapulisan agud nga masolbar ang kaso.
