Nagpanawagan ang Schools Division Superintendent sang South Cotabato nga indi magpalapta sang wala pa makumpirmar nga impormasyon nahanungod sa bilang sang mga napatay sa shooting incident sa Banga National High School.
Sa interview sang Bombo Radyo Koronadal ginpahayag ni SDS Leonardo Balala, nga tatlo pa lamang ang kumpirmado nga fatalities base sa impormasyon sang medical officer, kag kinahanglan hulaton ang opisyal nga verification antes magpagwa ukon mag-share sang iban nga casualty figures.
Ginpahayag ni Balala nga mahimo pa magbag-o ang sitwasyon bangud may yara pa sang mga wounded nga ginabulong sa nagkalain-lain nga ospital kag ginapangamuyuan nga makalampuwas.
Suno pa sa SDS, ang isa sa tatlo ka napatay amo ang ginatudlo nga perpetrator sang insidente, samtang padayon pa ang pag-verify sang iban nga detalye sang kaso.
May mga wounded man nga ginapauli na halin sa ospital matapos ma-assess nga minor ang ila mga pilas.
Lakip diri ang mga pilas nga resulta sang pagdinaguso sang mga estudyante sang natabo ang insidente.
Samtang, ginpahayag ni Balala nga ang desisyon sa suspension sang face-to-face classes ginatugyan sa mga local chief executives.
Sa Banga, nagdeklara na si Mayor Boyet Palencia sang suspension sang face-to-face classes sa Lunes.
Ginalauman man nga maghatag sang tagsa-tagsa nga assessment kag desisyon ang iban pa nga mga mayor sa South Cotabato depende sa sitwasyon sa ila mga lugar.
Ginpahayag man ni Balala nga indi anay pagpagwaon sang Schools Division ang detalyado nga impormasyon nahanungod sa whereabouts sang mga estudyante kag ila mga ginikanan agud maprotektahan ang privacy kag seguridad sang mga pamilya kag malikawan ang paglapta sang indi matuod nga impormasyon.
Samtang, may mando na halin sa South Cotabato provincial government nga buligan ang mga apektado nga pamilya, ilabi na ang mga pamilya sang mga napatay kag napilasan sa insidente.
