KORONADAL CITY- Naglab-ot na sa 3 ang mga napatay bangud sa diarrhea outbreak sa Purok Spring, Barangay Lampari, Banga, South Cotabato.
Ini ang ginkumpirma ni Barangay Chairman Rahib Mama- Brgy. Captain Brgy Lampari Banga sa interbyu sang Bombo Radyo Koronadal.
Suno sa iya, ang mga nagdugang nga mga napatay amo ang isa ka Grade 10 student kag isa ka 33 anyos nga kaupod sa halos 70 ka indibidwal nga naigo sang diarrhea kag naka eksperyensya sang pagkasakit sang tyan, pagbawas sang higko kag pagsuka.
Napatay suno pa ang duha bangud sa severe dehydration kag sa pagkamatuod ang isa sa mga ini ang nagpositibo sa COVID 19.
Sa inisyal nga resulta sang test sang higko sang pasyente, naggwa nga positibo ini sa amoeba, nga kung sa diin amo ini ang ginkumpirma man ni Dr. Cheron Gampon, head sang Emergency Room ng Socksargen General Hospital.
Sa karun, ginahulat pa ang resulta sang water sample nga ginpadala sa Research Institute for Tropical Medicine (RITM).
