Nanindigan ang defense team na 16 boto ang kinakailangang voting threshold para ma-convict si Vice President Sara Duterte sa impeachment trial.
Ito ang iginiit ni Atty. Michael Wesley Poa ng defense team sa kanyang oral argument sa pagsisimula ng ika-29 na araw ng impeachment trial.
Ayon kay Atty. Poa, malinaw sa Konstitusyon ang 16-vote threshold at hindi na ito dapat bigyan ng ibang interpretasyon, kundi dapat lamang ipatupad.
Binigyang-diin niya na hindi para sa kapakinabangan ng depensa ang kanilang posisyon sa voting threshold, kundi dahil naniniwala silang ito ang naaayon sa Konstitusyon.
Dagdag pa ni Atty. Poa, hindi dapat gamitin ang rule on quorum upang baguhin o i-rewrite ang constitutional provision hinggil sa voting threshold para sa conviction.
“Your Honors, let us not use the rule on quorum to rewrite the constitutional provision for the voting threshold to convict. Your Honors, maari bang bumoto ang mga hindi nagpaparticipate? Well to us respectfully, unless the impeachment court prohibits them from doing so, they can vote. Because as mentioned last week, we are a court of records.”
Ipinaliwanag din niya na maaaring bumoto ang isang senator-judge na hindi nakadalo sa pagdinig, maliban kung pagbabawalan ito ng impeachment court. Aniya, maaari namang repasuhin ng mga senador ang transcript ng pagdinig, Senate journals at mga video ng impeachment trial.
“Maari naman pong basahin ang TSN or transcript. Maaring reviewin ang journals. Maari na nga pong mapanood ang nangyayari sa trial through videos. Now, if that Sen. Judge does not feel that he or she can render an impartial judgment dahil nga absent po siya, well Your Honors, hindi lang naman yes or no ang boto. Pwede namang mag-abstain.”
Dagdag pa ni Atty. Poa, kung hindi naniniwala ang isang senator-judge na makapagbibigay siya ng patas na desisyon dahil sa kanyang pagliban, maaari rin itong mag-abstain sa pagboto.
