KORONADAL CITY – Ginatudlo karon sa grupo sang Bangsamoro Islamic Freedom Fighters nga responsable sa pagpang-ambush sa kapulisan sang Ampatuan Municipal Police Station nga nagresulta sa pagkapatay sang duha kalakip na ang chief of police kag pagkapilas sang tatlo ka iban pa sa Brgy. Kapimpilan, Ampatuan Maguindanao.
Ginkilala ni PBGEN. John Gano Guyguyon, Regional Director sang PRO-BAR ang mga napatay nga sanday Police Lieutenant Reynaldo Samson, hepe sang Ampatuan PNP kag PCp/ Salipuden Talipasan Endab samtang ang tatlo ka PNP personnel nga napilasan amo sanday PSMS Reynante Quinalayo, Pcpl Rogelio Dela Cuesta jr, Pcpl Clint Marc Dayaday nga lunsay mga miyembro sang Ampatuan MPS.
Suno kay Guyguyon, hugot nila nga ginakondenar ang hitabo kag ginapatutukan na ang imbestigasyon sini agud masiguro nga mapasabat ang responsable sa insidente.
Dugang pa sang opisyal, igasang-at kuntani sang grupo ni Lt. Samson ang warrant of arrest batuk kay Kamir Kambal alias Meds sa kaso nga Robbery nga gin-isyu ni Judge Anabelle Piang sang 12th Judicial Region, Branch 15, Shariff Aguak, Maguindanao.
Apang samtang padulong sa lugar ginbalabaga ini sang masobra napulo ka mga armado nga kalalakihan nga ginpamunuan ni Guipar Abdulkarim at Bantukan Andog alias Cmdr Boy Jocket, Sala Tunda, Johari Abdulbasser Guinaid, Phepe Saptulah, Abdulrah Sapal kag isa pa ka Bro Sapal, Bobot Kamsa alias Borgo nga ginapatihan mga myembro sang BIFF.
Nagapati si General Guyguyon nga nakahibalo ukon may nagleak nga information sa pagpatigayon sang operasyon rason nga naunahan ang mga tinwao sang PNP sang armado nga mga kalalakihan.
Sa karon, yara na sa luwas nga sitwasyon na ang 3 ka mga pilason.
Samtang, nagpromisa naman si General Guyguyon sa pamilya sang mga biktima nga igahatag ang nagakaigo nga hustisya.
Ginpabaskog man ang hot pursuit operation sang Maguindanao PPO batuk sa mga suspek.
