KORONADAL CITY-Hugot nga ginkondena sang Presidential Task Force on Media Security (PTFoMS) ang natabo nga pagpangluthang-patay sang riding-in-tandem criminals kay Jaynard Angeles,isa ka anay media practitioner sa syudad sang Tacurong sang adlaw sang Martes, Enero 12 2022.
Sa pahayag nga gin paguwa ni Undersecretary Jose Joel Sy Egco, Executive Director sang Presidential Task Force on Media Security (PTFoMS), ginkasubo sini ang nagluntad sang makangilidlis sang krimen sa diin isa ka miyembro sang media practioner ang biktima kag gin promisa nga indi pag e-tolerar ang amu nga panghitabo.
Nagpromisa man ini sa pamilya kag himata sang biktima nga makig koordinar ang ila nga talatapan sa PNP para sa madasig nga pag resolbar sa krimen kag sa madasig nga pagdakop sa mga suspek nga yara sa likod sang krimen kag mapanabat sa atubang sang kasuguan. Suno naman kay P/LtCol. Joan Maganto, Hepe sang Tacurong CPS, naga patigayon na sila nga backtracking sa kaso ni Angeles agud nga matumod ang posible nga mastermind sang pagpatay.
Dugang pa sini, posible nga 3 ang motibo sa pagpatay kay Angeles kun sa diin mahimo nga may kaangtanan sa iya nga obra bilang isa ka Komentarista, politika ukon personal grudge. Madumduman nga ginluthang si Angeles sa atubang sang isa ka auto repair shop sa bahin sang Purok Sampaguita, Brgy. New Carmen, Tacurong City kun sa diin nakaangkon ini sang fatal wounds nga nangin tunaan sang hinali sini nga kamatayon.
