KORONADAL CITY – Naglab-ot na sa halos 100 ang ginbawian sang kabuhi matapos marumpag ang atop sa warehouse sang Amazon.com Inc malapit sa US city sang St. Louis matapos ang mabaskog nga pagpanalasa sang buhawi kag bagyo.
Ini ang ginpahayag ni Balt Quinain, Bombo International Correspondent sa Florida USA sa interbyu sang Bombo Radyo Koronadal.
Suno sa iya, isa ka “mass casualty incident” ang natabo kun sa diin madamo nga mga indibidwal ang na-trapped sa sulod sang warehouse.
Wala na naghatag pa sang dugang nga detalye ang ahensya kun pila ang napagkit nga pilason bangud sa natabo apang nahibaluan nga yara na sa masobra 100 ang naulamid kag 70 ang una nga ginbawian sang kabuhi sa nasambit nga insidente.
Gindugang pa sini nga ginpalibutan naman sang madamo nga emergency service vehicles ang lugar.
Pila naman ka mga drones ang makit-an sa kahawaan kun sa diin ginakuhaan sang footage ang lugar samtang ginahimos sang mga otoridad ang mga nakalapta nga debris.
Samtang, nagpaabot naman sang pagpangamuyo si Illinois Governor JB Pritzker sa mga indibidwal nga na-trapped kag nagpasalig nga pagabuligan niya ini pinaagi sa paghatag sang tanan nga mga kinahanglanon.
Nahibaluan nga nag-isyu ang US National Weather Service sang tornado warning sa pila ka mga lugar sa mga estado sang Arkansas, Tennessee, Missouri ,Illinois kag Kentucky.
