KORONADAL CITY – Nalapnos sa nagkalain-lain nga bahin sang lawas ang duha ka side walk vendors makaligad nga nagsigabong ang isa ka improvised burner sa banwa sang Arakan, North Cotabato.
Suno kay Police Lt. Jamer Nawa, deputy chief of police sang Arakan PNP , isa ka menor de edad kag isa ka ginang nga mga residente sang Barangay Doroluman Arakan North Cotabato ang mga biktima.
Ginpahayag sang mga ini nga samtang nagaluto sila sang ila ginabaligya nga fried chicken hinali na lamang nagsigabong ang improvised burner nila.
Bangud sa natabo, napilasan ang mga biktima sa nagkalain-lain nga parte sang ila nga lawas tuga man sang kabaskugon sang pagsigabong.
Gilayon naman sila nga gindala sa balay-bululngan kag ginabulong na.
Sa subon nagapadayon ang imbestigasyon sang Arakan Municipal Police Station sa nasambit nga hitabo.
