Nagpabutyag sang kabalaka ang isa ka delivery rider sa Syudad sang Koronadal bangud sa indi na balanse nga kita kag nagasaka nga presyo sang gatong.
Sa interview sang Bombo Radyo Koronadal kay MJ Catalan, isa ka delivery rider, iya ginpahayag nga nabudlayan sila sa pagpatigayon sang ila pang-adlaw-adlaw nga obra bangud naganubo man ang ila ginakabig nga kita ukon fare.
Suno kay Catalan, dako nga bahin sang ila earnings ang nagakadto sa gasto sa gatong, gani nagabudlay para sa ila nga mapun-an ang iban pa nga kinahanglanon sa adlaw-adlaw.
Bangud sini, nagpanawagan si Catalan sa gobyerno nga indi na pagpanubuan ang ila earnings ukon fare agud mangin mas balanse ang ila kita kag ang nagapadayon nga pagsaka sang presyo sang gatong.
Dugang pa niya, importante nga mahatagan sang konsiderasyon ang kahimtangan sang mga delivery rider nga nagasalig sa ila adlaw-adlaw nga kita para sa pangabuhi kag amo man ang nagasabat sang nagkalain-lain nga panginahanglan sang mga konsumidor.
