Nagpromisa sang assistance si House Senior Deputy Speaker Dinand Hernandez sa mga biktima kag pamilya nga naapektuhan sang shooting incident sa Banga National High School.
Sa interview sang Bombo Radyo Koronadal ginpayag ni Hernandez, gin-mobilize na niya ang iya staff agud magbulig sa mga biktima nga yara sa mga ospital, ilabi na sa ila mga kinahanglanon samtang nagapadayon ang pagbulong.
Plano man ni Hernandez nga makapauli sa Mindanao upod si Education Secretary Sonny Angara agud makigkita kay South Cotabato Governor Reynaldo Tamayo Jr., Banga Mayor Boyet Palencia, mga opisyal sang Department of Education kag iban pa nga otoridad. Kabahin sa ila plano ang pagbisita sa eskwelahan kag sa mga pamilya sang mga biktima.
Samtang, ginpahanumdom ni Hernandez ang publiko nga indi anay maghimo sang konklusyon ukon magpalapta sang wala pa makumpirmar nga impormasyon tuhoy sa motibo kag kabangdanan sang insidente samtang nagapadayon ang imbestigasyon.
Kaangot sini, ginpabug-atan niya ang kinahanglanon sang dugang nga security measures sa mga buluthuan, lakip ang public kag private schools.
Dugang pa niya, kinahanglan man nga mapalig-on ang mental health kag psychological support para sa mga kabataan. Ginpahayag ni Hernandez nga may pending bill siya tuhoy sa mental health sang mga kabataan kag ginpunto ang importansya sang sapat nga guidance counselors kag psychometricians sa mga buluthuan.
Suno sa iya, kinahanglan indi lamang shooting incidents ang preparasyon sang mga eskwelahan, kundi pati man iban nga concerns nga nagaapekto sa kabataan, lakip ang suicide nga nagakinahanglan sang mas seryoso nga intervention.
May gin-file man, suno kay Hernandez, nga mga hagna nahanungod sa access sang mga kabataan sa online platforms, accountability kag gun safety. Lakip sa ginahatagan niya sang importansya amo ang responsibilidad sang mga ginikanan nga siguruhon nga indi maka-access ang ila mga kabataan sa firearms.
Sa iya mensahe sa mga estudyante, teachers kag pamilya sang mga biktima, ginpasiguro ni Hernandez nga makig-angut ang ila opisina sa provincial kag municipal governments kag DepEd agud makahatag sang bulig, psychological intervention kag iban pa nga suporta sa mga naapektuhan.
Sa tunga sang padayon nga imbestigasyon, ginpabug-atan ni Hernandez ang tatlo ka prayoridad: bulig para sa mga biktima, mas mabakod nga seguridad sa mga buluthuan, kag dugang nga mental health support para sa mga kabataan.
