Nagpaigting sang seguridad ang Koronadal National Comprehensive High School (KNCHS) sa sulod kag palibot sang campus kasunod sang shooting incident sa Banga National High School.
Sa interview sang Bombo Radyo Koronadal ginpahayag ni Sonny Pama, Assistant Principal for Operations and Learner’s Support sang KNCHS, indi na nila hulaton nga may matabo nga kaangay nga insidente antes magpatuman sang dugang nga preventive measures.
Lakip sa ginaplano kag ginapatuman sang eskwelahan ang pagdugang sang uniformed security guards, mas hugot nga koordinasyon sa kapulisan kag intelligence units para sa police visibility, kag pag-install sang dugang nga CCTV cameras sa palibot sang campus.
Ginpaathag ni Pama nga strikto man ang security protocols sa entrance sang eskwelahan. Kinahanglan may school ID ang mga estudyante, samtang ginagamit ang metal detector sa pag-check sang posible nga metal nga dala sa sulod.
Bangud sa mas hugot nga inspection, ginapaabot nga magdugay ang proseso sang pagsulod sang mga estudyante. Gani, nag-adjust ang school administration sang schedule agud malikawan ang daku nga epekto sini sa klase.
Aminado si Pama nga wala sang makahatag sang 100 porsyento nga kasiguraduhan nga indi gid matabo ang insidente sa campus, apang ginpahayag niya nga ginapatuman sang eskwelahan ang tanan nga posible nga preventive measures para sa seguridad sang mga estudyante.
Gin-awhag man sang school administration ang mga ginikanan kag estudyante nga magkooperar sa security protocols, magpabilin nga alerto kag mag-report dayon sang bisan ano nga makaduluda nga impormasyon ukon sitwasyon sa mga otoridad.
