KORONADAL CITY – Nagapadayon sa subong ang damage assessment sang Provincial Disaster Risk Reduction and Management Office (PDRRMO) sang North Cotabato sa damyos nga ginbilin sang pagpanalasa sang baha sa banwa sang Antipas kag Matalam sa nasambit nga probinsiya.
Sa interbyu sang Bombo Radyo Koronadal kay PDRRMO Chief of Operations Arnulfo Villaruz, bangud sa mabaskog nga pagbubo sang ulan nga naeksperiensiyahan sa probinsiya ginbaha ang Barangay Luhong sang banwa sang Antipas kun diin madamo nga puluy-an ang ginsulod sang tubig-baha labi na ang mga yara sa low-lying areas.
Mangin ang national highway ang ginbaha man kun diin ginatos nga mga motorista ang na-stranded kahapon nga nagdugay sang 2 tubtob 3 ka oras.
Suno pa kay Villaruz, may mga nareport man nga mga puluy-an nga ginbahaan sa bahin sang Matalam kag nagapadayon ang damage assessment sa lugar.
Samtang, may mga nareport man nga magagmay nga landslide sa nabukid nga bahin sang nasambit nga banwa.
