Sa wakas, magaumpisa na ang konstruksyon sang ginapaabot nga Koronadal City Hospital, ini ang nangin pahayag ni South Cotabato Governor Reynaldo Tamayo Jr.
Kadungan sang groundbreaking ceremony sa pagtukod sang Manuel C. Callejo–City of Koronadal Infirmary Hospital sa Barangay Rotonda gin-anunsyo ni Gov. Tamayo ang ginapaabot nga pagumpisa sang konstruksyon sang Koronadal City Hospital bilang kabahin sang pagpauswag sang serbisyo panglawas sa probinsya.
Ginpahayag ni Tamayo nga importante ang pagbinuligay sang provincial kag city local government units (LGUs) agud mapalapad ang access sang mga pumuluyo sa bulig medikal.
Kabahin man sang plano sang probinsya ang pagbutang sang ginapaabot nga 15,000 ka health navigators sa nagkalain-lain nga purok agud mamonitor ang panglawas sang mga panimalay kag mapadasig ang paghatag sang serbisyo.
Dugang pa sang gobernador, handum sang provincial government nga mapauswag ang South Cotabato Provincial Hospital bilang Level 3 hospital, samtang ginapaabot nga mangin tertiary-level hospital sang rehiyon ang regional hospital sa Surallah.
Gindugang man niya ang importansya sang kooperasyon sang mga LGU sa pagpalig-on sang referral system, agud ang mga pasyente maasikaso halin sa rural health units tubtob sa mas mataas nga lebel sang pag-atipan sa magkatuhay nga mga balay-bulolngan dire sa Probinsya sang South Cotabato.
