KORONADAL CITY – Nagdepensa si Barangay Kapitan Nida Parañaque sang Barangay Ned, Lake Sebu, South Cotabato sa reklamo sang mga residente sa ila barangay sa pagpabayad nila sang P65 sa “control point pass” kag P65 man sa Barangay Certification sa mga nangin benepisaryo sang SAP Financial assistance.
Sa eksklusibo nga interbyu sang Bombo Radyo Koronadal kay Kapitan Parañaque , ginpahayag sini nga ang P65 nga balayran sa sin-u-man nga magkuha sang Barangay Certification ang nakasaad sa ila barangay ordinance samtang ang P65 nga balyran sa travel pass nga gintawag nila “control point pass” ang ginbase lamang nila sa munisipyo.
Suno kay Paranaque, temporary receipt ang una nila nga nahatag sa mga nagkuha sang travel pass bangud naubusan sila sang Official Receipt.
Napilitan lamang suno pa ang barangay nga mag-isyu sang travel pass sa mga nagapangayo sini bangud sa ila rason nga emerhensiya apang natukiban nila nga ginagamit ini sang mga residente agud lamang makaguwa sa ila banwa kag magkadto sa Isulan, Sultan Kudarat ukon Maitum, Saranggani province.
Samtang, hugot naman nga ginpanginwala ni Mayor Floro Gandam nga may kamanduan halin sa iya ang pagpanukot sang travel pass mangin man ang pagsulod sang pila ka mga negosyante.
Suno kay Mayor Gandam, nakapakig-angot na sa iya ang brgy. council sang Brgy. Ned agud nga magpaathag kag nakapakig-angot naman suno pa sa talatapan sang DILG.
Kaangot sini, ginapasiguro ni Mayor Gandam nga mas padaluman pa ang imbestigasyon may kaangtanan sa mga reklamo nga nagluntad sa iya nga nasakupan.
Nagpahayag man sang kahandaan si Kapitan Parañaque nga igabalik ang ginbayad nga P65 sang mga nagkuha sang travel pass.
