ALEOSON, COTABATO – Naglab-ot sa anum ang napatay lakip na ang isa ka SAF member sa ginpatigayon nga police operation nga nagresulta sa madugo nga engkwentro sa tunga sang PNP operatives kag armado nga grupo sa Purok 7, Barangay New Panay, Aleosan North Cotabato pasado alas otso Miyerkules sang aga.
Ini ang ginkumpirma ni Aleosan Chief of Police, Police Major Jennefer Amotan.
Suno sa Aleosan PNP, magaserbe kuntani sang search warrant ang PNP Operatives sa target person nga si Macabuat Salik alias Kwat / Iskoh sa kaso nga paglapas sa Republic Act 10591 kag 9165 nga may kaangtanan sa illegal possession of firearms kag illegal drugs.
Samtang padulong pa lamang sa lugar ang mga operatiba ginpalukpan na sila sang mga armado nga nagresulta sa engkwentro nga nagdugay sang 30 minutos.
Matapos ang engkwentro napatay ang target person nga si Macabuat Salik kaupod ang lima ka mga kaupdanan sini sa pagkambyhanay sang lupok.
Samtang, isa man ka miyembro sang PNP SAF ang napatay sa engkwentro nga ginkilala kay Police Corporal Jed Michael Gregorio, 33 years old.
Samtang, ginakilala naman ang mga police operatives nga napilasan sa engkwentro nga sanday PCapt Marc Bryant S Tamid-ay , PCapt Kirk K John P Kollin , PSMS Alcher L Dacula, PCpl Mark Joseph T Galanta, PCpl Emonrick Sornillo Gadat, kag si Pat John Steven V Luyun.
Narekober naman sa operasyon ang isa ka dako nga pakete sang ginapatihan nga shabu kag mga highpowered firearms sang mga suspek.
