Napatay ang indi magnubo sa tatlo ka tawo sa Davao Region kag Soccsksargen bangud sa epekto sang Bagyong Kiyapo kag Habagat.
Apang suno sa National Disaster Risk Reduction and Management Council (NDRRMC), padayon pa gihapon ang pagberipikar sa amo nga report.
Nadula naman ang isa ka tawo sa Soccsksargen bangud sa epekto sang mabaskog nga ulan kag pagbaha.
Naapektuhan ang masobra 193,000 ka indibidwal ukon sobra 41,000 ka pamilya halin sa 258 ka barangay sa pito ka rehiyon tungod sa mas mabaskog nga pag-ulan nga dala sang amo nga mga kalamidad.
Samtang, yara naman sa temporaryo nga mga evacuation center ang sobra 9,000 ka tawo para sa ila seguridad.
Nagguba naman ang 235 ka balay sa Western Visayas, Zamboanga Peninsula, Soccsksargen, kag BARMM, lakip ang 158 ka partially damaged kag 77 ka totally damaged nga balay.
Ginamonitor gihapon sang mga awtoridad ang Bagyong Kiyapo bisan yara na ini sa guwa sang Philippine Area of Responsibility (PAR), bangud mahimo pa ini makapalig-on sang Habagat nga nagadala sang mabaskog nga ulan sa pila ka bahin sang pungsod.
