Ginabulubanta nga walo ka milyon ka tawo sa bug-os nga Pilipinas ang naapektuhan sang nagbaskog nga habagat, lakip na sang mga bagyo nga Luis, Maymay kag Neneng.
Suno sa datos nga ginpagwa sang National Disaster Risk Reduction and Management Council (NDRRMC), 2.3 milyon ka pamilya ukon walo ka milyon ka indibidwal halin sa napulo ka rehiyon ang naapektuhan sang kalamidad.
Mga 25,800 ka indibidwal ang yara gihapon sa 297 ka evacuation centers sa nagkalain-lain nga bahin sang pungsod.
Nakaabot na sa 32 ang napatay, kag 15 sini ang halin sa Benguet.
Samtang, 19 ka tawo ang napilasan kag tatlo ang padayon nga ginapangita.
Nadangat naman sa ₱6.11 bilyon ang halit sa imprastraktura, samtang ginabulubanta nga ₱2.32 bilyon ang halit sa agrikultura.
Mga 2,900 ka balay ang naguba ukon nag-antos sang halit, kag 349 sini ang lubos nga naguba.
Tubtob sang Sabado, 117 ka lugar sa pungsod ang gin-deklarar nga yara sa idalom sang state of calamity.
