Nag-abot sa P135.3 milyon ang labug-uson sang danyos kag kapierdihan sa sektor sang agrikultura bangud sang pagpanalasa sang nagligad nga mga bagyo nga Maymay kag Luis, kag sang habagat.
Base sa nagapadayon nga damage assessment sang mga regional office sang Department of Agriculture (DA), napagkit ang mga danyos sa agrikultura sa Ilocos Region, Central Luzon, Calabarzon, Mimaropa kag Western Visayas. Kapin 4,000 ektarya sang mga agricultural area ang naapektuhan.
Pinakadako ang danyos kag kapierdihan sa mga commodity nga bugas, sunod ang mais, high-value crops, kasapatan kag poultry, lakip na ang mga pasilidad sa irigasyon, mga makina kag kagamitan.
Bangud sa mga kalamidad, nagresulta ini sa 4,465 metriko tonelada nga production loss.
Bilang sabat sa sini, ginpahayag sang DA nga ang mga naapektuhan nga mangunguma mahimo makakuha sang P106.5 milyon nga kantidad sang farm inputs, pareho sang binhi sang bugas, mais kag mga utanon.
Mahimo man sila makakuha sang loan nga tubtob P25,000 halin sa Survival and Recovery Loan Program sang Agricultural Credit Policy Council.
