-- ADVERTISEMENT --

Importante ang pagkamatinlo, mahinalungon kag pagkabalansi sa pagbalita, ilabi na sa mga kontrobersyal nga isyu kaangay sang flood control projects kag alegasyon sang korapsyon sa pondo sang gobyerno.

Ini ang ginpahayag ni Dennyze Dawb De Asis, National Presenter sang Radio Broad Team sang KNCHS, kasunod sang nagalapta nga diskusyon sa social media nahangunod sa alegasyon nga may mga pulitiko nga nagagamit sang pondo sang publiko para sa personal nga interes.

Suno kay De Asis, masubo nga mabatian ang kaangay nga mga alegasyon bilang isa ka Pilipino, apang indi dapat ini mangin rason para magpadala sa personal nga may ginadampigan ukon magpresentar sang impormasyon nga wala pa na beripika.

Dugang pa niya, responsibilidad sang kada journalist nga siguruhon ang kamatuoran kag ka-esakto sang impormasyon, magpabilin nga neutral kag hatagan sang patas nga kahigayunan ang tanan nga partido nga nagakabig sa isyu nga makapahayag sang ila panig.

Gani, ginpahanumdom niya ang mga campus journalist kag media practitioners nga sundon ang prinsipyo sang journalism ethics, agud malikawan ang paglapta sang misinformation kag mapabilin ang pagsalig sang publiko sa media.