Nakapagkit ang National Kidney and Transplant Institute (NKTI) sang lima ka pasyente nga napatay bangud sa leptospirosis kasunod sang pila ka semana nga pag-ulan kag pagbaha tuga sang Habagat.
Suno sa datos sang balay-bululngan, 19 na ka kaso sang leptospirosis ang ila napagkit halin Hunyo, kag ang pinakaulihi nga pasyente napatay matapos maglala ang kondisyon kag magdugo ang baga.
Suno kay NKTI nephrologist Dr. Arlene Lamban-Crosson, madamo sa mga pasyente ang nagakadto sa ospital nga malala na ang ila kahimtangan.
Ginpahayag niya nga mahimo nga indi gilayon makita ang mga sintomas sang leptospirosis gani nagaduha duha ang pagpangayo sang medikal nga bulig.
Lakip sa mga una nga sintomas sini ang hilanat, kasakit sang lawas, kag pagpula sang mga mata.
Kun maglala ang sakit, mahimo magpanilaw ang panit ukon mata, magbag-o ang kolor sang ihi, magnubo ang pag-ihi, kag mahimo man mag-ubo ukon magsuka sang dugo.
Samtang, nakapagkit naman ang San Lazaro Hospital sang 50 ka kaso sang leptospirosis, lakip ang 24 ka bag-o nga pasyente nga na-admit sa sulod lamang sang 24 oras.
Duha naman ka pasyente ang napatay sa amo nga ospital.
Ginpaandaman sang mga doktor nga mahimo pa magdugang ang mga kaso bangud mahimo magdugay sang duha tubtob 30 ka adlaw ang incubation period sang leptospirosis.
Gani, gin-awhag ang publiko nga likawan ang paglusong sa baha, ilabi na kun may pilas, kag maggamit sang bota kag tabunan sang maayo ang mga pilas kun indi malikawan ang pagtabok sa baha.
