Na-isolate ang mga 1,000 ka pamilya sa Barangay Santa Fe, San Marcelino, Zambales bangud sa pagkaguba sang isa ka tulay matapos ang pila ka semana nga mabaskog nga pag-ulan.
Lakip sa mga apektado ang mga katutubo nga residente sa lugar.
Nag-apaw ang lahar halin sa Mount Pinatubo matapos maguba ang isa ka dike bangud sa padayon nga pag-ulan dala sang Habagat.
Natabunan sang lahar kag mabaskog nga baha ang pila ka bahin sang komunidad, samtang 10 ka balay ang lubos nga naguba kag 22 pa ang partially nga naguba.
Apang, gilayon man nga nakabakwit ang mga residente bangud nagahinay-hinay ang pagsaka sang lahar, kag wala sang may napagkit nga napatay ukon seryoso nga napilasan sa insidente.
Naguba man sang Agosto 9 ang taytay nga ginagamit sang mga residente sa pagsulod kag paggwa sa lugar, gani may mga pamilya kag katutubo nga padayon nga stranded.
Samtang, naghatag na ang lokal nga panguluhan sang pagkaon nga igo para sa tatlo ka adlaw para sa mga apektado nga residente.
Kun magpadayon ang pag-ayo sang panahon sa masunod nga duha tubtob tatlo ka adlaw, magapatindog ang San Marcelino LGU sang temporaryo nga kahoy nga taytay para sa mga pedestrian kag temporaryo nga steel bridge para sa mga tricycle.
