-- ADVERTISEMENT --

Mas ginapabaskog sang City Anti-Drug Abuse Council (CADAC) sang Koronadal City ang bloodless approach sa kampanya kontra illegal nga droga, nga nagatutok sa prevention, rehabilitation kag reintegration sang mga drug dependents.

Sa interview sang Bombo Radyo Koronadal ginpahayag ni Rey Calanao, CADAC Action Officer, prayoridad sang kasamtangan nga administrasyon ang paglikaw sa madinugo-on nga operasyon kag pagpalig-on sang partisipasyon sang mga barangay kag komunidad.

Ginahatagan man sang technical assistance sang LGU ang lima ka barangay nga wala pa makakuha sang drug-cleared status, partikular sa pagkompleto sang mga kinahanglanon para sa Community-Based Drug Rehabilitation Program (CBDRP).

Dugang pa ni Calanao, padayon ang monitoring kag aftercare services sa mga naggradwar sa rehabilitation program agud masiguro ang ila padayon nga recovery kag reintegration sa komunidad, lakip ang paghatag sang intervention sa mga nagakaeksperyensya sang relapse.

Kabahin man sang iya prayoridad ang pagpaayo sang referral system sang CADAC agud mapahapos ang proseso para sa mga kliyente, kag pagpalig-on sang suporta sa barangay anti-drug programs kag faith-based rehabilitation activities.

Ginpunto man niya ang importansya sang koordinasyon sang CADAC, PNP, barangay officials, media kag iban pa nga partner agencies, lakip ang paghatag sang nagakaigo nga suporta kag seguridad sa mga media partners nga nagabulig sa kampanya kontra droga.