Ginpasiguro ni South Cotabato Governor Reynaldo Tamayo Jr. nga dapat mahatagan sang hustisya ang pamilya sang 8-anyos nga bata nga napatay sa aksidente nga gina-imbolbaran sang police patrol vehicle kag motorsiklo sa syudad sang Koronadal.
Nagpaabot sang pakig-unong kag pagpangasubo si Gov. Tamayo sa pamilya sang biktima kag ginpasalig nga himuon ang nagakaigo nga mga tikang agud masiguro nga makabaton sila sang hustisya.
Samtang, nagapadayon ang patas, maid-id kag transparent nga imbestigasyon sa insidente.
Ginpahayag man ni Gov. Tamayo nga wala sing bisan sin-o nga labaw sa kasuguan kag kinahanglan masunod ang due process sa pag-atubang sang amo nga kaso.
Sa karon, nagapabilin man sa kustodiya sang kapulisan ang pulis nga nagamaneho sang patrol vehicle nga nagbunggo sa motorsiklo nga ginasakyan sang bata kag iya lola.
