KORONADAL CITY – Nagapadayon ang imbestigasyon sang mga otoridad sa nasapwan nga bangkay sang isa ka 19-anyos nga estudyante sa tubuhan sa banwa sang President Quirino, Sultan Kudarat.
Ginkilala sang kapulisan ang bangkay nga si Alyas Bebe nga residente sang Barangay Malingon, Presidente Quirino, Sultan Kudarat.
Naguwa sa ibestigasyon nga nadula ang estudyante apang nasapwan na lamang ini alas-5:00 sang hapon sang Martes, Nobyembre 5, 2024 sa talamnan sang tubo sa bahin sang Purok 3B, Barangay Tinaungan sa nasambit nga banwa.
Suno sa pamilya sang bikyima, wala sila makahibalo kun ngaa ginpatay ini bangud wala man ini sang kaaway kag wala man sila sang ihibalo kun sin-o ang ulihi nga nakaupod sini.
Nahibaluan nga may pilas sa ulo ang biktima kag sa nagkalain-lain nga bahin sang lawas sini nga ginapatihan agi sang isa ka kutsilyo ukon matalom nga butang.
Ginapatihan nga ginbuno sa nagkalain-lain nga parte sang iya lawas ang biktima nga gintunaan sang kamatayon sini.
Madumduman nga isa ka mangunguma ang nakakita sa bangkay sang biktima kun diin gilayon naman nga ginlubong sandig sa kultura sang Muslim.
Hingyo naman sang pamilya sang biktima ang maidid nga imbigasyon sang kaso kag nagasinggitan sila sang hustisya para sa biktima.
