Patay ang 15 ka tawo matapos magtipping ang isa ka speedboat nga nagasakay sang mga Indian tourists malapit sa isla sang Hon May Rut Ngoai sa Vietnam, suno sa mga lokal nga media.
Suno sa mga otoridad, may yara sang 32 ka Indian nationals kag apat ka tripulante nga sakay sang speedboat nga nagtipping mga 400 metros ang kalayuon halin sa Hon May Rut Ngoai Island bangud sang mabaskog nga balod kag hangin sang Sabado.
Gilayon nga nagbulig ang pila ka tourist vessels nga naga-operate sa lugar para sa rescue operation.
Madamo sa mga pasahero ang nakita nga naipit sa sulod sang speedboat, suno sa VnExpress. Sa katapusan, 21 ka tawo ang naluwas.
Ang Hon May Rut Ngoai Island yara mga 10 kilometro sa nakatungdan sang Phu Quoc, ang pinakadako nga isla sang Vietnam.
Suno kay Nguyen Tien Hai, isa ka mataas nga opisyal sang Communist Party sa lugar, padayon pa ang pagberipikar sang mga otoridad sa eksakto nga bilang sang mga napatay kag sang mga nakaluwas.
Dugang pa niya, posible nga nagtipping ang speedboat bangud sang mabaskog nga hangin kag dagku nga balod.
Gintawag naman sang Indian Embassy sa Vietnam nga isa ka “makaluluoy nga insidente” ang natabo kag ginpaguwa ang kumpleto nga listahan sang 32 ka Indian nationals nga sakay sang nalumsan nga speedboat.
